Ciñel tatar telendä yazılgan kitaplar bu köngä kadär dönya külämendä yazılmagan ide.

Omumän cıñel teldä yazılgan kitaplar uku yäki tel öyränü avırlıkları belän köräşkän ukuçılarga yärdem itü maksatı belän yazıla. Läkin bu kitaplar tatarça ukırga öyränä torgan yäki uku häm tel säläten nıgıtırga telegän törle yäştäge ukuçılarnı da küzdä totıp yazıldı.

Kitaplar pedagogika belemenä tayanıp, ukuçını törle belem ölkäläre belän tanıştıra häm ziräklekkä öyrätä. Alar belän tatar telen öyränergä häm tel baylıgın üsterergä da mömkin.

Kitaplarnı Sabira Stahlberg şved telendä yazdı häm şved telennän tatarçaga Finlandiyädä yäşäüçe Fazile Nasretdin tärcemä itte. Dönya külämendä azçılık telendä, ciñel tel konseptın kullanıp, kitaplar berençe märtäbä Finlandiyädä çıgarıldı. Bu kitaplar ciñel teldä yazılgan ädäbiyatnıñ üseşenä etärgeç bulsınnar ide.

Kitaplarga bäyle östämä materiallar häm biremnär Edu Bokpil sahifäsendä tabıla.

Tatarça ciñel tel

Tatarçada ciñel telneñ konseptı häm kriteriyları bu vakıtka hatle bilgelänmägän ide. Mäsälän, şved, ingliz, alman häm başka tellärdä bolar küptän inde kuyılgan. Kriteriyalarnı añlau häm alarnı kuyu avır mäsälä bulıp çıktı. Tärcemä itü eşe dä şul säbäptän buştan başlap kitü sıman buldı.

Tellärneñ tözeleşläre törleçä bulsa da, başka tellärdäge tausiyälär häm täcribälär belän çagıştırıldı. Mäsälän, kitaplarnıñ tekstı kıska rätlär belän yazıldı, tatar teleneñ tözeleşe, süz häm cömlä ozınlıgı h.b ş. soraular östendä eşlärgä turı kilde.

Halıkara tatarça

Tatar tele dönyanıñ törle yaklarında törleçä söylänelä häm yazıla. Nindi tatar telendä kitaplarnı yazarga başvatkıç mäsälä bulıp çıktı. Şul säbäptän halıkara tatar tele digän töşençäse tudı. Halıkara tatar tele cir şarınıñ törle yaklarında yäşäüçe tatarlarnıñ telenä tayana. Kitaplarnıñ yazılışı öçen Finlandiyädä kullanıla torgan tatar latin älifbası saylandı. Ciñel tatar teldä yazılgan kitaplar törle illärdä yäşäüçe tatarça ukuçılarga, faydalı bulsınnar ide.

Tatarça söyläüçe omerendä tatar telen törleçä söyli torgannar belän oçraşırga mömkin. Şunıñ öçen telneñ tösmerlärenä häm üzgäreşlärenä balaçaktan uk tanışu faydalı häm üzläşterüe dä ciñel.

Bigräk tä internettä küptörle yazularga häm söylämnärgä duçar bulu bik tä mömkin. Telne törleçä belü yaña işeklär aça. Tatar telendä ukırga öyränergä häm teleñne nıgıtırga teläsäñ, bu kitaplardan başla.

Proyekt koordinatorı Sabira Stahlberg häm tärcemäçe Fazile Nasretdin

Proyekt Ciñel Tatarça Tampere tatar cämiyäte, Finlandiya İslam Cemaati häm Oskar Öflund väkıfı yärdämnäre belän çın barlıkka aşırıldı. Yärdämnäre öçen samimi rahmätlärebez.

Kitaplar: Villa Bokpil

Östämä materiallar: Edu Bokpil